Original writeup from Lug Pov
Kaab mob kev tuag hauv dlej hauv num.
1. Tug qhuab ke (Txiv Ncaws Kev)
2. Cuab Tsaav (Laig Dlaab)
3. Nam Txiv Dlaab
4. Txwj Laug (Hau Teb Hau Chaw)
5. Cuag Laug
6. Xov Txiv Dlaab
7. Thawj Thawv (Kaav Xwm)
8. Lwm Thawv (Tshwj Kaab)
9. Xaab Thawv (Txiv Txag)
10. Xwm Thawv (Nam Ua Mov)
11. Vwg Thawv
12. Luj Thawv
13. Txhij Thawv
14. Puaj Thawv
15. Caw Thawv
16. Txiv Qeej Txiv Nruag
17. Nam Dlaj Zeb Tuav Cug (Hov Paug Cug)
18. Tub Tshaaj Phaaj (Kaav Tsum)
19. Thawj Txiv Tsev
20. Thawj Nam Tsev
21. Tub Teev Ntawv
1. Tug Qhuab Ke(Taw Kev ) nuav tes thov leej twg los tau tsuav yog txawj xwb.
2. Tug Cuab Tsaav (Laig Dlaab) nuav mas yuav tsum yog tug kwv. Cov laug thaus u mas yuav tsum yog tug kwv nam txiv ib plaab yug ua xwb yog kawg tsi muaj tug kwv nam txiv ib plaab yug le lawm mas maam siv tug kem zog lug ua. Txheej nwg nuav tes pheej muab tug kem lug ua lawm xwb. Yog tug laug es muaj tsaj tua sawv thawv nua tes muab nwg hu ua Cuab Tsaav. Yog tej nyuas yau los yog tej hluas es tsi muaj tug tsaj tua sawv thawv nua tes muab nwg hu ua Tug Laig Dlaab.
3. Nam Txiv Dlaab mas yuav tsum yog tug nug nam txiv ib plaab yug xwb. Yog tsi muaj tug nam txiv ib plaab yug los siv tug kem zog xws le tij tub kwv tub los kuj tau hab. Yog cov kws muaj ob peb tug nam mas tej laug txuj kev ua mas luas tsuas feeb rua nam hlub cov neej tsaa xwb. Luas yeej tsi has txug nam yau cov le. Txawm has los luas yeej tsi kaam ua. Yog nam hlub cov neej tsaa feeb lug nua tes nam nraab, nam yau cov txhaj kaam ua xwb. Lub neej nwg nuav tes yog hu nam hlub tug ua Nam Txiv Dlaab lawm tes ca le hu Nam Yau tug ua Kaav Xwm lawm xwb. Yog tug quas yawg tuag nua tes yuav tsum hu nam hlub tug nug tuaj ua Nam Txiv Dlaab, hu nam yau tug tuaj ua Kaav Xwm. Yog ob tug nam tuag nua tes leej twg tuag hu leej twg tug nug tuaj ua Nam Txiv Dlaab.
4. Tug Txwj Laug mas yuav tsum yog tug hau teb hau chaw (tug nom tswv kws nyob lub zej lub zog los yog nyob lub teb chaws ntawd) los yog tug txheeb kwv tij kwv npawg kws paub taab muaj kev sib hlub sib paab thaum tseem ua neej nyob.
5. Tug Cuag tes yog tug vauv txiv. Thaus u tej laug tes yog tug nam tuag tes hu tug vauv hlub txiv tuaj ua tug cuag (los yog tug vauv hlub txiv tsi nyob lawm tes ca le hu ncaaj qhaa kom tug vauv tuaj ua tug cuag). Yog tug Txiv tuag tes hu tug vauv Ntxawg Txiv tuaj ua tug cuag. Lub neej nwg nuav tes muab pauv lawm. Nam tuag tes hu tug vauv Ntxawg tuaj ua tug cuag. Txiv tuag tes hu tug vauv hlub tuaj ua tug cuag lawm. Tej nuav yog tuaj pauv teb chaws MesKas nuav xwb.
6. Xov Txiv Dlaab tes yog cov tub nyaab le nug yog cov kws tuaj ua. Feem ntau tej laug coj tes yog txiv tseem nyob tes peb hu nwg kuas peb tsi kom tuaj ua cuag nyaab tab si kom tuaj ua Xov Txiv Dlaab. Nwg ua los tau huas nwg muab rua nwg tug tub ua los tau. Tag mas Xov Txiv Dlaab tes yuav tsum yog tug nug ua xwb. Cuag nyaab tes yog leej txiv ua xwb.
7. Thawj Thawv (Kaav Xwm) yog 2 tug. Ib tug yog tog kwv tij tug. Ib tug yog tog neej tsaa tug. Ob tug nuav yog ob tug kws lug dlha ib puas tsaav yaam huv lub nteeg. Ob tug nuav yuav tsum yog tug tuab neeg kws paub. Tshwj xeeb yog tug Kaav Xwm tog Kwv Tij.
8. Lwm Thawv (Tshwj Kaab) yog ob tug ua zaub. Ib tug yog tog kwv tij. Ib tug yog muab tug yawm yij hlub lug ua. Cov laug thaus u mas muab tug txheeb txheeb lug ua xwb. Nwg nuav tes muab tug kem lug ua lawm xwb.
9. Xaab Thawv (Txiv Txag) yog ob tug kws yuav tau moog ntuv ntoo ua txag rua tug tuag. Ib tug yog tog kwv tij. Ib tug tes yog tug yawm yij thib ob. Yog tsi muaj nua tes maam siv tug kem zog xws les tug yawm laug tug vauv los si yog tug txiv ntxawm tug vauv.
10. Xwm Thawv (Nam Ua Mov) yog ob tug kws ua mov rua lub nteeg ntawd. Ib tug yog tog kwv tij. Ib tug tes yog tug yawm yij yau. Yog tsi muaj tug koom nam koom txiv tes siv tug yawm yij kws kem zog los tau. Txheej nwg nuav tes yeej siv tug kem lawm xwb.
11. Tug Vwg Thawv, Luj Thawv, Txhij Thawv, Puaj Thawv, Caw Thawv nuav tes nyob ntawm saib ob tug Kaav Xwm kom ua dlaab tsi xwb.
16. Txiv Qeej. Yog miv nyuas yau tes thov 2 tug txiv qeej. Yaav ntuj thaus u tes yog ib tug quas laug tuag tes thov 3 tug Txiv Qeej. Ib tug yog txiv qeej huv tsev, ib tug yog txiv qeej neej tsaa, tug thib 3 tes thov leej twg los tau. Lub neej nwg nuav tes feem ntau thov 4 tug txiv qeej lawm xwb.
17. Nam Dlaj Zeb Tuav Cug( Hov Paug Cug) yog tug kws yuav tua tuav ntsab coj lug ua mov. Nwg nuav tsi siv lawm vim peb muab ntsab lug ua mov lawm.
18. Tub Tshaaj Phaaj (Kaav Tsum) yog tug tuab neeg kws thov lug saib lub tsum mov tsaam muaj tsaj lug phoom. Nwg nuav tsi siv lawm.
19. Thawj Txiv Tsev yog tug kws lug txais tog kwv tij neej tsaa hab lug paab saib tej khoom kws yuav siv rua lub nteeg los yog kom ccov tub xyom cuab moog yuav tej khoom kws yuav siv.
20. Tug thawj Nam Tsev yog tug kws lug coj kev paab saib kev noj haus hab khoom txom ncauj los yog paab cov nam ua mov.
21. Cov tub teev ntawv yog cov kws lug sau ntaub ntawv khaws tej kwv tij neej tsaa tej txaj ntsig tseg.
Kev thov cov hauv dlej hauv num: Yaav ntuj thau u mas yuav tsum tau coj dlej cawv moog thov txhua tug hauv dlej hauv num huv luas lub vaaj lub tsev. Nwg nuav tes feem ntau siv lub tes les foos hu lawm xwb. Txawm siv lub foos hu los yug tseem has rua tug tuab neeg ntawd tas yug yuav moog thov nwg tom tsev. Feem ntau suav dlawg yeej tsi yuav cai le tej laug thaus u lawm tes yog ua tau tes ca le leeg huv lub xuv tooj xwb. Thaum hu moog rua tug tuab neeg kws yug thov ntawd tes has le nuav: Koj nyob tsev nua tes kuv tuaj tom koj tsev kod tuaj nrug koj thaam ib plag. Thaum nuav tug tuab neeg ntawd yuav nug saib koj yuav moog thaam dlaab tsi. Koj maam qha rua nwg paub qhov koj yuav moog nrug nwg thaam. Moog thov dlaag zug. Yog nwg tsi kaam tes koj ca le thov nwg huv foos xwb. Yog le tes has le nuav nawv yog koj tsi xaav le caag los kuv txawm tuaj tsi txug huv vaaj huv tsev tuaj has koj ib lus ols koj txhob xaav le caag nawv. Yeeb vim ntuj txiv tsi nqug teg ntuj nam nqug taw es peb (tug tuab neeg tuag ntawd npe) tau tso peb tseg lawm es yuav vaam koj utaj moog paab peb ua (tug num) es txawm tuaj tsi txug huv koj vaaj tsev los thov koj txhob xaav le caag es koj tuaj paab peb nawv.